Լոռու մարզային գրադարանում գործող «Առողջապահական կամուրջ» ռեսուրս կենտրոնը ավարտեց 3-րդ խմբի դասընթացները: Երրորդ խմբի դասընթացը վարեց բշիշկ-դասախոս Արմինե Մանուչարյանը: Մարտի 1-ին կայացավ «Կրծքագեղձի քաղցկեղի կանխարգելման մեթոդներ» դասախոսությունը, որն ուղեկցվում էր նույն թեմայով տեսաֆիլմի դիտումով: Դասախոսությունը հագեցված էր վիճակագրական տվյալներով, բժշկական պրակտիկայում հանդիպած օրինակներով, օգտակար խորհուրդներով: Տրվեցին պատասխաններ ծագած բոլոր հարցերի վերաբերյալ: Խմբի անդամների վիճակագրական հարցումը վկայեց դասընթացի դրական արդյունքների մասին:
Փետրվարի 29-ից մինչեւ մարտի 5-ը Սլովենիայի Լյուբլյանա քաղաքում կայացավ EIFL միջազգային կազմակերպության կոնֆերանսը, որին հրավիրվել էին դրամաշնորհային ծրագրերի հաղթող կազմակերպությունները (12 երկիր): Նպատակը փորձի փոխանակումն էր: Լոռու մարզային գրադարանը ներկայացնում էր ծրագրի կամավոր Քեյթ Լեստինան: Վերադառնալուն պես՝ փետրվարի 24-ին կազմակերպվեց միջոցառում, որի ժամանակ Լեստինան ներկայացրեց կոնֆերանսի աշխատանքի արդյունքները: Շատ հետաքրքիր էր նաեւ Լյուբլյանայի գրադարանների մասին պատրաստված տեսանյութը: Միջոցառմանը ներկա էր նաեւ Բերդի գրադարանի ներկայացուցիչ Կանաչ արահետներ հասարակական կազմակերպության տեղեկատվության մասնագետ Նարա Յարալյանը, որը պատմեց Բերդի գրադարանի գյուղատնտեսական ուղղվածություն ունեցող ծրագրի մասին: